МИНЕРАЛИ – КАЛЦИУМ

Постојат дваесетина различни минерали кои влегуваат во составот на нашиот организам. Тие претставуваат 5% од целокупната тежина на нашиот организам, односно 3,5 кг кај возрасно лице од 70 кг. Во нашиот организам минералите постојано се обновуваат. Преку урината, столицата, потта, и другите секрети, секој ден се исфрлаат околу 30 грама минерали кои задолжително треба да се внесат со храната.

Најголем извор на минерали се растенијата. Продуктите од растително потекло, особено ако се биолошки исправни, претставуваат најважен извор на минерали. Месниот и другите режими на исхрана кои опфаќаат рафинирани производи се сиромашни со минерали поради употребата на вештачки ѓубрива. Оттаму производите што ги купуваме на пазар содржат помалку минерали од оние што му се потребни на организмот. Значи, мораме да посветиме поголемо внимание и да внесуваме минерали во организмот, особено калциум и железо.

Калциумот е најобилен минерал во човечкиот организам, чиишто соли образуваат супстанца која им дава цврстина на коските и забите. Телото на возрасен човек содржи 1 до 1,5 кг калциум од кој најголем дел се наоѓа во коските (99%), а само мал дел (1%) во крвта и во другите делови на организмот.

Освен што е носител на скелетот, калциумот има и други важни функции:

– Учествува во пренесувањето на нервните имплуси, особено од срцето, обезбедувајќи го срцевиот ритам.

– Неопходен е за нормална коагулација на крвта.

– Ја регулира рамнотежата меѓу киселините и базите во крвта, спречувајќи ја нејзината преголема киселост – ја неутрализира киселината во крвта која е производ на метаболизмот на протеините.

За да биде апсорбиран и да премине во крвотокот, на калциумот му е потребен витамин D. Недостигот од витамин D ги предизвикува истите симптоми како и недостигот од калциум. Недостигот од калциум најпрво се покажува во вид на болни грчења на мускулите, што може да доведе до спазма. Ако потрае таа состојба, настапува нарушување на срцевиот ритам (срцето како да прескокнува), нервна раздразливост, губиток на цврстината на коските (рахитис кај децата, остеопороза и остеомалација кај постарите), болки во зглобовите, испаѓање на забите.